Efnalitlir fá minni meðferð en betur stæðir

Ríkir og langskólagengnir sjúklingar í Danmörku fá fleiri meðferðir og liggja lengur inni á sjúkrahúsum heldur en þeir efnaminni og veikari. Þetta er niðurstaða rannsóknar á vegum Center for Alternativ Samfundsanalyse, CASA, sem Politiken vitnar í.

Í hvert sinn sem efnalítill ellilífeyrisþegi fær blóðtappa eða blæðingu í heila liggur hann inni að meðaltali í 17 daga. Meðferð hans kostar að meðaltali 14 þúsund danskar krónur á dag, segir í Politiken. Efnaður ellilífeyrisþegi liggur inni í 20 daga og meðferð hans kostar 16 þúsund danskar krónur á dag að meðaltali. Hagfræðingar skoðuðu samfélagslega stöðu og meðferð 32 þúsund sjúklinga sem fengið höfðu heilablæðingu og 11 þúsund sjúklinga með hjartakvilla á árunum 2010 til 2012

Rannsóknin leiddi jafnframt í ljós að þeir sem eru enn á vinnumarkaði fá betri meðferð heldur en ellilífeyrisþegar.

Formaður regnhlífarsamtaka danskra sjúklinga, Lars Engberg, segir niðurstöðurnar sláandi.