Fjarlægja minnisvarða um Jobs vegna samkynhneigðar Cook

Sérstakur minnisvarði um Steve Jobs, stofnanda Apple, hefur verið tekinn niður á háskólasvæði í Sankti Pétursborg. Ástæðan er nýleg yfirlýsing Tim Cook, forstjóra Apple, um að hann sé samkynhneigður.

Minnisvarðinn var í formi stærðarinnar iPhone-síma með mynd af Jobs. Í yfirlýsingu frá  fyrirtækinu ZEFS, sem lét reisa minnisvarðann, er bent á að rússnesk lög banni opinbera umræðu um samkynhneigð og kveði á um að refsivert sé að afhjúpa kynhneigð sína opinberlega. Það sé skýring þess að hann hafi verið tekinn niður.

„Eftir að forstjóri Apple talaði opinberlega um afbrigðilega kynhegðun var minnisvarðinn tekinn niður í samræmi við rússnesk lög til að vernda börn frá upplýsingum sem hvetja þau til að afneita hefðbundnum fjölskyldugildum,“ segir í tilkynningunni og sagt er frá í frétt Reuters.

Cook greindi í síðustu viku frá því opinberlega að hann væri samkynhneigður. „Þó að ég hafi aldrei neitað kynhneigð minni, þá hef ég ekki viðurkennt hana opinberlega heldur þar til nú. Leyfið mér því að tala skýrt: Ég er stoltur af því að vera samkynhneigður og álít það að vera samkynhneigður vera mestu gjöf guðs til mín,“ sagði Cook í pistli sem hann birti á Businessweek á fimmtudaginn.

Að sögn fréttaveitunnar Tass á háskólinn að hafa fengið tilkynningu frá ZEFS nokkru áður en Cook greindi frá samkynhneigð sinni um að til stæði að gera við minnivarðann vegna skemmda. ZEFS hefur þó ekki tjáð sig um það.