Fékk rautt spjald fyrir að slást við áhorfanda

Það sauð upp úr í stórleik Tel Aviv-liðanna, Hapoel og Maccabi, í gær.

Leikurinn var flautaður af í hálfleik en þá var ástandið á vellinum orðið stjórnlaust.

Lætin byrjuðu fyrir alvöru þegar Eran Zahavi jafnaði leikinn fyrir Maccabi. Hann fagnaði markinu með því hlaupa bak við markið og ógna stuðningsmönnum Hapoel.

Einn þeirra stökk þá inn á völlinn, ber að ofan, og byrjaði að slást við Zahavi. Leikmaðurinn fékk síðan rauða spjaldið fyrir að slást við áhorfandann við litla hrifningu stuðningsmanna Maccabi.

Nokkrum mínútum síðar varð önnur uppákoma er fjöldi stuðningsmanna beggja liða hljóp inn á völlinn. Þá var ekkert annað í boði en að flauta leikinn af.

„Ég er í losti og skammast mín fyrir að tengjast fótbolta í dag," sagði Eyal Berkovic, þjálfari Hapoel, en hann lék með Southampton, West Ham, Celtic, Blackburn, Manchester City og Portsmouth á sínum tíma.

„Það þarf að refsa báðum félögum grimmilega vegna þessarar uppákomu."

Íþróttamálaráðherra Ísraels segir að þetta sé skammarlegt og málið verður skoðað á æðstu stöðum.