Gæti verið á leið í fangelsi fyrir að gefa heimilislausum mat

90 ára gamall maður gæti verið á leiðinni í fangelsi fyrir að gefa heimilislausu fólki að borða. Ný lög í Fort Lauderdale í Flórída banna fólki að gefa almenningi mat, og þar með talið heimilislausum. The Independent greinir frá.

Arnold Abbott var handtekinn í almenningsgarði á sunnudaginn þar sem hann var að gefa heimilislausum mat. Hann gæti átt yfir höfði sér 500 dollara sekt og 60 daga fangelsi en lögreglumenn handtóku hann og tvo presta fyrir lögbrot.

Árið 1999 fór Abbott í mál við Fort Lauderdale eftir að borgaryfirvöld bönnuðu honum að gefa heimilislausum að borða á ströndinni. Dómstóll komst að þeirri niðurstöðu að bannið væri í andstöðu við stjórnarskrána.

Nýju lögin sem tóku gildi í seinustu viku kveða meðal annars á um að matarvagnar verði  að vera meira en 500 fet frá íbúðarhúsum. Góðgerðarsamtök hafa harðlega gagnrýnt lögin.