Ákærður fyrir glæpi gegn mannkyninu

Ríkisstjórn Rúmeníu hefur ákært fyrrverandi fangelsisstjórann Alexandru Visinescu fyrir glæpi gegn mannkyninu vegna pyntinga og dauða 12 fanga á árunum 1956-1963.

Á þeim tíma var kommúnistastjórn við lýði í Rúmeníu. Er talið að um hálf milljón manna hafi setið í fangelsi vegna pólitískra skoðana sinna á 6. áratugnum er kommúnistastjórnin reyndi að brjóta á bak aftur alla mótspyrnu á meðal þjóðarinnar.

Í frétt Al Jazeera kemur fram að um 100.000 fangar hafi dáið vegna hungurs, pyntinga og kulda.

Kommúnisminn leið undir lok í Rúmeníu fyrir 25 árum. Árið 1964 var veitt almenn sakaruppgjöf vegna glæpa sem framdir voru í skjóli kommúnistastjórnarinnar á 6. áratugnum. Sárin hafa þó aldrei gróið og er nú reynt að leita réttlætis.

Auk Visinescu eru yfir 30 aðrir fangelsisstjórar sem gætu verið ákærðir fyrir glæpi gegn mannkyninu.