85 ára nunna fyrirgefur nauðgara sínum

85 ára gömul nunna í Pensilvaníu í Bandaríkjunum fyrirgaf 19 ára manni sem réðst á hana og nauðgaði henni, þegar hann var dæmdur í gær. Maðurinn var dæmdur í 18 og hálfs til 37 ára fangelsisvistar.

Fórnarlambið mætti ekki í dómsal í gær, en önnur nunna las upp tilkynningu frá henni í dómsalnum.

„Ég bið innilega fyrir því að þú, Andrew, munir nýta þau menntunar, uppbyggjandi og samfélagslega jákvæð úrræði sem þér munu bjóðast í fangelsisvist þinni,“ sagði nunnan í yfirlýsingu sinni samkvæmt AP fréttaveitunni.

Nunnan stóð við endurvinnslugám í desember í fyrra þegar Andrew Bullock gekk að henni og bauðst til að hjálpa henni að setja dagblöð í gáminn. Þá beraði hann sig, kýldi hana svo hún datt á andlitið og nauðgaði henni.