Árásarmaðurinn á Frakkastíg dæmdur í tveggja og hálfs árs fangelsi

Hafþór Fjalar Kristinsson var í Héraðsdómi Reykjavíkur í dag dæmdur í tveggja og hálfs árs fangelsi fyrir sérstaklega hættulega líkamsárás sem átti sér stað á Frakkastíg í ágúst. Maðurinn sem fyrir árásinni varð krafðist 2,5 milljóna króna í miskabætur en Hafþóri er gert að greiða honum 900 þúsund krónur.

Hafþóri var gefið að sök að hafa ítrekað stungið manninn í líkama og andlit hinn 9. ágúst. Maðurinn hlaut í kjölfarið skurð yfir vinstra kinnbeini og á aftanverðum brjóstkassa, tvo skurði og hægri upphandlegg og skurð á hægri mjöðm.

Samkvæmt vitni að árásinni var Hafþór áberandi ölvaður umrætt kvöld. Vitnið sagði hann hafa verið með ólæti og ógnandi tilburði á Bar 7 á Frakkastíg og sveiflað þar um Leatherman-töng, sem er með hnífi í öðrum endanum. Maðurinn sem var stunginn var þar í hópi þriggja.  Sagði hann Hafþór hafa hlaupið upp Laugarveg, blóðugan á höfði eftir beltissylgju. Síðan hafi hann rokið aftur niður Frakkastíg og stungið manninn margoft.

Hafþór á nokkurn sakaferil að baki en hann hefur tvívegis verið dæmdur í fangelsi fyrir líkamsárás, fyrst árið 2010 og svo árið 2012. Hafþór var úrskurðaður í gæsluvarðhald á grundvelli almannahagsmuna 10. ágúst og hefur síðan þá dvalist á Litla-Hrauni. Sá tími kemur til frádráttar fangelsisdómnum.

Hafþór var í héraði í dag einnig sakfelldur fyrir ölvunarakstur og var sviptur ökuréttindum ævilangt.