Hazard finnur ekki fyrir aukinni pressu

Eden Hazard veit að hann hefur ekki verið upp á sitt besta hingað til í keppninni þrátt fyrir að Belgar hafi unnið alla leiki sína til þessa. Telur hann að hann geti gert helmingi betur í útsláttarkeppninni sem hefst í dag þegar Belgar mæta Bandaríkjunum.

„Ég finn ekki fyrir aukinni pressu þrátt fyrir að ég viti að það eru margir að fylgjast með mér en ég nálgast alla leiki eins. Ég gæti þess bara að gera mitt allra besta í öllum þeim leikjum sem ég tek þátt í. Ég veit ekki hvað fólki finnst um frammistöðu mína hingað til en ég verð bara að gefa mitt besta í leikina sem eftir eru. Ég hef aðeins verið á hálfum hraða hingað til,“

Hazard á von á erfiðum leik á eftir og gerir hann ráð fyrir að bandaríska liðið muni reyna að taka harkalega á honum. Hann ætlaði hinsvegar ekki að láta neitt slíkt hafa áhrif á sig.

„Þeir eru með líkamlega sterkt lið en ef þeir eru alltaf að brjóta á mér þýðir það að ég sé að eiga góðan dag. Ég vonast til þess að þeir brjóti sem oftast á mér þar sem þá fáum við aukaspyrnur og fleiri tækifæri til þess að skora mörk,“ sagði Hazard sem hefur líkt og margir aðrir hrifist af spilamennsku James Rodríguez hingað til á mótinu.

„Ég hef fylgst með James, Messi og Neymar og reyni að fá innblástur af því að horfa á þá spila. Velgengni James sem hefur verið besti leikmaður mótsins kemur mér ekki á óvart, við mættum kólumbíska landsliðinu og ég hef séð hann í frönsku deildinni þar sem hann sýndi hæfileikana sína. Öll tölfræði gefur til kynna að hann hafi verið besti leikmaður mótsins hingað til,“ sagði Hazard.