Ramos getur bara hringt ef hann hefur eitthvað að segja

Sergio Ramos, leikmaður Real Madrid, gaf það í skyn í viðtali við fjölmiðla í síðustu landsleikjaviku að sumir leikmanna Spánar sýndu landsliðinu ekki nógu mikinn metnað.

Cesc Fábregas, leikmaður Chelsea, gaf ekki kost á sér í leikina gegn Hvíta-Rússlands og Þýskalandi vegna meiðsla og tók þessi orð Ramosar til sín.

„Já, ég móðgaðist og sagði Sergio hvernig mér leið. Við töluðum á endanum saman í símann og nú er allt í góðu á milli okkar,“ sagði Fábregas í viðtali á útvarpsstöðinni Cande Cope.

Ramos hafði áður sagt að orðum hans væri ekki beint að Fábregas, en Chelsea-maðurinn vill samt sem áður ekki heyra svona frá liðsfélögum sínum í gegnum fjölmiðla.

„Það fór virkilega í taugarnar á mér að metnaður minn var dreginn í efa. Ég hef spilað margsinnis fyrir Spán og mætt í landsliðsferðir án þess að spila. Ég á samt 94 leiki fyrir Spán síðustu níu ár,“ sagði Fábregas.

„Ég var aumur aftan í læri og ef ég hefði spilað hefði ég getað lent í svipuðum meiðslum og Luka Modric.“

„Ég sagði Ramos að ef hann hefur eitthvað segja við mig skal hann bara rífa upp símann og hringja, en ekki senda mér skilaboð í gegnum fjölmiðla. Við erum nú eftir allt saman búnir að spila saman síðan í U21 árs liðinu.“