Dæmdu gegn hjónaböndum samkynhneigðra

Bandarískur áfrýjunardómstóll úrskurðaði á fimmtudag bann við hjónaböndum samkynhneigðra í fjórum ríkjum löglegt. Þetta er í fyrsta sinn sem áfrýjunardómstóll sem starfar þvert á ríki dæmir gegn hjónaböndum samkynhneigðra.

Taldar eru líkur á að dómurinn hafi í för með sér að hæstiréttur Bandaríkjanna þurfi að taka afstöðu til málsins en áður hefur dómurinn hafnað því að taka til meðferðar fimm mál af sama toga. Var það gert á grundvelli þess að áfrýjunardómstólar hefðu allir úrskurðað gegn banni.

Hingað til hafa áfrýjunardómstólar komist að þeirri niðurstöðu að bann við hjónaböndum samkynhneigðra brjóti gegn stjórnarskrárvörðum rétti fólks.

Þrátt fyrir að hafa ekki viljað fjalla um bönn einstakra ríkja hefur hæstiréttur áður fjallað um hjónabönd samkynhneigðra. Árið 1996 komst rétturinn að þeirri niðurstöðu að alríkisstjórninni væri ekki heimilt að banna einstaka ríkjum að viðurkenna rétt samkynhneigðra til að gifta sig.

Dómurinn lét hinsvegar vera að taka afstöðu til þess hvort einstaka ríki mættu banna hjónaböndin. Nú virðast vera uppi þær aðstæður að ekki verði um flúið fyrir dóminn að taka afstöðu til rétts samkynhneigðra til að gifta sig.