Leiðréttingin kynnt eftir helgi: Svona samþykkir þú skuldaleiðréttinguna

Skuldaleiðrétting ríkistjórnarinnar verður kynnt næsta mánudag. Stærsti hluti þeirra sem um hana sótti, eða rúmlega 90 prósent þeirra, fá kynningu á niðurstöðum útreikninga á lánum sínum.

„Þessir sem eftir eru fá tölvupóst um leið og niðurstöður eru klárar. Biðin verður ekki löng, það eru bara þessi flóknustu tilvik sem eftir standa. En þetta mun á engan hátt skerða réttindi fólks,“ segir Tryggvi Þór Herbertsson, verkefnastjóri um framkvæmd höfuðstólslækkunar íbúðalána.

Með skuldaleiðréttingunni verða verðtryggð húsnæðislán færð niður um fjárhæð sem samsvarar verðbótum umfram 4,8% sem féllu til á tímabilinu desember 2007 til ágúst 2010. Þetta samsvarar um 13% leiðréttingu á vísitölu neysluverðs til verðtryggingar. Hámarksfjárhæð niðurfærslu á heimili verður 4 milljónir króna, segir á heimasíðu forsætisráðuneytisins.

Samþykki leiðréttingarinnar hefst í desember og áætlað er að einstaklingar hafi 90 daga til að undirrita og samþykkja niðurstöðuna.  Til að samþykkja leiðréttinguna þarf að notast við rafræn skilríki. Viðkomandi þarf að vera með SIM-kort (símakort) sem styður rafræn skilríki. Hægt er að kanna hvort símakortið styðji rafræn skilríki með því að smella hér. Frekari leiðbeiningar má finna hér.

Styðji símakortið ekki rafræn skilríki getur fólk orðið sér úti um slík á eftirfarandi stöðum:

* Nova – leiðbeiningar

* Síminn – leiðbeiningar

* Tal – leiðbeiningar

* Vodafone – leiðbeiningar

Virkja þarf skilríkin í viðskiptabanka viðkomandi og að því loknu er hægt að fara á heimasíðu leiðréttingarinnar og samþykkja niðurstöðuna.

Hafi fólk ekki möguleika á rafrænum skilríkjum í símann, eða vill það ekki, er hægt að sækja um einkaskilríki frá Auðkenni.

Í meðfylgjandi myndböndum má sjá ferlið allt, skref fyrir skref.