Þröngt mega alifuglar sitja

Stofnað hefur verið til undirskriftasöfnunar á netinu þar sem ákvæði í reglugerð um alifugla, sem nú er í vinnslu hjá atvinnuvega- og nýsköpunarráðuneyti Sigurðar Inga Jóhannssonar, er harðlega mótmælt. Undirskriftasöfnunin er að undirlagi samtakanna Velbú – samtök um velferð búfjár og þegar hafa vel á sex hundruð manns skrifað undir áskorun.

Mótmælin snúa að „þéttleika alifugla til kjötframleiðslu. Við undirrituð gerum alvarlegar athugasemdir við ákvæði í reglugerð um aðbúnað alifugla (drög 6. maí 2014) sem er í vinnslu hjá atvinnuvega- og nýsköpunarráðuneytinu, er snúa að þéttleika alifugla til kjötframleiðslu. Að okkar mati er bæði um afturför frá núverandi reglugerð (1995) að ræða auk þess sem ný viðmið reglugerðarinnar ganga þvert á markmið nýrra laga um velferð dýra sem tóku gildi 1.1.2014,“ segir á síðunni.

Bent er á að í 30. grein reglugerðarinnar, sem snýr að þéttleika kjúklinga, er mælt með að hámarksþéttleiki fugla sé aukinn upp í  33kg/m2 og eru einnig gefnar undantekningar upp í 42 kg/m2. „Við teljum að þetta sé of mikill þéttleiki sé tillit tekið til velferðar dýranna.“