Fjögur ljón drepin í danska dýragarðinum alræmda

Danski dýragarðurinn sem vakti athygli fyrir rúmum mánuði síðan þegar gíraffanum Maríusi var lógað vekur athygli á ný. Í þetta sinnið hafa fjögur ljón verið drepin til þess að leggja leið fyrir nýju karldýri. CNN segir frá.

Ljónunum var lógað á mánudag, sagði Tobias Stenbaek Bro, talsmaður dýragarðsins. Tvö ljónanna voru ekki nægilega gömul til þess að spjara sig á eigin spýtur. Nýja karlljónið dræpi þau ungu, ef tækifæri gæfist. Sagði hann að dýragarðurinn hafi reynt að finna þeim samastað annarsstaðar, en að enginn hefði haft áhuga. Hin tvö ljónin sem voru aflífuð höfðu verið foreldrar hinna ungu.

Í tilkynningu frá dýragarðinum kemur fram að aðstæður hafi neytt umsjónarmenn ljónanna til þess að lóga þeim gömlu og afsprengum þeirra. Tilkynningin segir ljónahjarðir hafa slíka hegðun og félagslega uppbyggingu að aflífunin hafi verið óumflýjanleg.

Unga ljónið sem er nýkomið til garðsins er 3 ára gamalt, stórvaxið miðað við aldur og við góða heilsu, samkvæmt dýragarðinum. Eftir að það hefur aðlagast umhverfi sínu verður gestum gert kleift að bera það augum.

"Viðbjóðslegt sláturhús"

Ákvörðun dýragarðsins um að skjóta gíraffann Maríus í febrúar vakti mikla athygli og hneyksli á heimsvísu, og aflífun ljónanna kyndir enn fremur undir reiði fólks.

"Hvers vegna heimsækir fólk þetta viðbjóðslega sláturhús," sagði í skilaboðum sem einhver skildi eftir á Facebook-síðu sem heimtar lokun dýragarðsins.

Í spilaranum fyrir neðan má sjá myndband með umfjöllun CNN um málið.