Kovac: Við ættum kannski að spila körfubolta

Niko Kovac, landsliðsþjálfari Króatíu, var grautfúll eftir 3-1 tap gegn Brasilíu í opnunarleik HM í kvöld.

Neymar kom Brasilíu 2-1 yfir í síðari hálfleik með marki úr umdeildri vítaspyrnu. Dejan Lovren var dæmdur brotlegur eftir að Fred féll í grasið við litla snertingu.

„Dómarinn var í góðri stöðu og sá þetta vel. Ég kenni ekki Fred um þetta. Ég set alla skuldina á dómarann,“ sagði Kovac.

„Ef það er svona sem við ætlum að byrja á HM þá getum við allt eins pakkað saman og farið heim,“ sagði Kovac.

„Réttu upp hönd ef þér fannst þetta vera vítaspyrna. Tveir milljarðar manns sáu að þetta var ekki víti.“

„Við tölum um virðingu en Króatíu var engin virðing sýnd í kvöld. Ef þetta var víti þá þurfum við ekki að spila fótbolta lengur. Við ættum kannski að spila körfubolta.“