Óvænt peningagreiðsla eftir rúmlega tólf ára bið

Sigurður Ragnar Eyjólfsson, þjálfari ÍBV, fékk óvænta peningagreiðslu á þriðjudag. Greiðslu sem hann hafði beðið eftir í tólf og hálft ár.

"Eftir tólf og hálfs árs málaferli í réttarkerfinu í Belgíu fékk ég loksins greidda kröfu mína í þrotabú félagsins," sagði Sigurður Ragnar á Facebook-síðu sinni en greiðslan kom úr þrotabúi Harelbeke en hann var á mála hjá félaginu um aldamótin.

"Hinn hluti málaferlanna, sem er sakamál gegn stjórnarmönnum félagsins er ennþá ólokið. Kannski ég bjóði fjölskyldunni út að borða á morgun í tilefni dagsis. Hálfur sigur unninn."

Sigurður Ragnar segir enn fremur að framkoma félagsins í hans garð hafi verið glæpsamleg.

Þjálfarinn sagðist ekki vilja ræða málið neitt frekar í fjölmiðlum er Vísir hafði samband við hann.