Beckham fær aðvörun frá stjóra MLS-deildarinnar

David Beckham, fyrrverandi landsliðsfyrirliði Englands í fótbolta, þarf að fara að sýna að eitthvað sé í gangi hjá MLS-liðinu sem hann er að reyna að stofna í Miami.

Beckham hefur fengið formlega aðvörun frá framkvæmdastjóra deildarinnar, Don Garber, þess efnis en málefni nýrra liða verða tekin fyrir hjá stækkunarnefnd deildarinnar snemma á næsta ári.

Beckham hefur gengið illa að fá leyfi til að byggja 25.000 manna völl í Miami-borg, en tvær hugmyndir sem hann lagði fram ásamt sínu teymi um byggingu á velli voru slegnar út af borðinu hjá borgarstjórn Miami á þessu ári.

„Þetta getur ekki gengið svona endalaust,“ segir Garber um endalausar tafir á uppbyggingu Miami-liðsins. „Beckham-hópurinn er að reyna að finna lausn á þessu vandamáli með völlinn,“ bætir Garber við.

MLS-deildin stækkar ört næstu ár, en 20 lið verða í henni á næsta ári þegar New York City FC og Orlando City FC bætast í hópinn. Tveimur árum síðar kemur svo inn lið frá Atlanta og annað lið í Los Angeles.

Beckham hefur verið bent á að deila velli með liði úr NFL-deildinni, en það ætlar nýja Atlanta-liðið að gera.

Þar eru reyndar hæg heimatökin því eigandi fótboltaliðsins er sá sami og á NFL-liðið. Hann er að byggja völl sem tekur 65.000 manns í sæti á NFL-leikjum og minnkar í 25.000 sæta völl fyrir knattspyrnuleiki.

Leikvangur NFL-liðsins Miami Dolphins getur hýst knattspyrnuleiki, en þar fóru nokkrir vináttulandsleikir fram fyrir HM í sumar.

Beckham hefur þó sagst vilja byggja nýjan knattspyrnuvöll þannig liðið hafi eitt einkenni og sinn heimavöll.