Hjartaaðgerð Tómasar á myndbandi: „Einstök upptaka“

Það þykir kraftaverki líkast að Sebastian Andrzej Golab hafi lifað af hnífsstungu á Hverfisgötu þann 23. nóvember síðastliðinn.

Hann var stunginn í gegnum hjartað en skjót handtök lækna urðu til þess að bjarga manninum sem hefur nú verið útskrifaður af Landsspítalanum.

Í þætti Kastljóss á RÚV í kvöld var sýnt ótrúlegt myndband frá aðgerð sem gerð var á Sebastiani. Í myndbandinu má sjá hvernig læknar Landsspítalans tóku á móti sjúklingnum og hvernig þeir aðhöfðust. Nauðsynlegt var að bregðast hratt við og hver sekúnda skipti sköpum.

Hnífurinn skildi eftir gat í hjartanu sem varð til þess að mikið blæddi úr því. Það voru skurðlæknarnir Tómas Guðbjartsson og Helgi Kjartan Sigurðsson sem tóku á móti Sebastiani á Landspítalanum, en báðir voru þeir á bakvakt heima hjá sér. Þegar á bráðamóttökuna var komið þurfti að brjóta upp brjóstkassann og hnoða hjartað með beinu hnoði sem þýðir að læknirinn hnoðar hjartað í höndunum.

Aðstæður voru gríðarlega erfiðar eins og sjá má á myndbandinu sem sýnt frá í þætti Kastljóssins í kvöld.

Það er gert til þess að koma af stað blóðflæði frá hjarta til heila. Það heppnaðist og í kjölfarið var gert við gatið á hjartanu. Á meðan var læknirinn með fingur í gatinu til þess að koma í veg fyrir að hjartað dældi út meira blóði. 



Tómas lýsti atburðarrásinni vel í þættinum í kvöld og talaði hann um að upptakan væri einstök. Sebastian fór fjórum til fimm sinnum í hjartastopp eftir að Tómas náði hjartslættinum aftur í gang. Það var vegna blóðleysis en talið er að Sebastian hafi misst um fimm lítra af blóði. 

„Við sjáum allt í einu að það var kominn blóðþrýstingur og allt að ganga í rétta átt. Þá var auðvitað að setja puttann í gatið, halda áfram að fylla blóð, og þegar sjúklingurinn var orðinn sæmilega stabíll þá tekur maður svona sauma í þetta gat sem er í hjartanu. Maður verður samt að passa sig hvað maður er að gera því það eru kransæðar þarna allt í kring sem liggja utan um hjartað og næra hjartað. Það er ekki sama hvernig maður gerir þetta,“ sagði Tómas í þættinum Í bítið á Bylgjunni í gær. 

Sebastian er mjög þakklátur starfsfólki Landspítalans fyrir björgunina. „Ég er orðlaus. Ég er bara venjulegur maður og myndi gefa þessu fólki sem bjargaði lífi mínu bæði allt sem ég á og ekki á,“ segir hann og vöknar um augun. Hann strýkur tárin burt úr augunum. „Ég er svo þakklátur, læknarnir björguðu lífi mínu,“sagði hann í samtali við Fréttablaðið á mánudaginn.

Þrír menn eru í gæsluvarðhaldi vegna árásarinnar. Mennirnir eru allir frá Póllandi en hafa verið búsettir hér á landi í nokkur ár. Fjórir voru handteknir á vettvangi en tveimur þeirra var sleppt að yfirheyrslum loknum. Auglýst var eftir fimmta manninum í fjölmiðlum fyrr í vikunni. Hann fannst á þriðjudag og situr nú í gæsluvarðhaldi vegna málsins. Mennirnir þrír verða í gæsluvarðhaldi til 8. desember.