21 látinn á Filippseyjum

Að minnsta kosti 21 er látinn og vegna fellibylsins Hagupit sem nú gengur yfir Filippseyjar. Mikil hætta er nú á flóðum og skriðuföllum. Íslendingur á svæðinu segir ástandið verst hjá þeim sem urðu illa úti þegar stærri stærri fellibylur reið yfir fyrir um ári.

Hálf milljón manna hefur flúið heimkynni sín vegna fellibyljarins sem sem gekk á land á föstudag og olli strax mikilli eyðileggingu. Bylurinn er nú yfir höfuðborginni Maníla en töluvert hefur dregið úr vindhraða, sem var í nótt um þrjátíu metrar á sekúndu en var 58 metrar þegar mest var.

Gert er ráð fyrir að fellibylurinn verði í nágrenni borgarinnar fram á kvöld og gangi yfir að tveimur dögum liðnum. Mikil úrkoma á svæðinu veldur yfirvöldum þó hugarangri því mikil hætta er á stórum flóðum og aurskriðum næstu daga.

Í fyrstu var talið að aðeins þrír hefðu látist af völdum fellibyljarins, en Rauði krossinn á Filippseyjum staðfesti í dag að sú tala væri komin upp í tuttugu og einn. Hagupit olli mikillli eyðileggingu á mið- og austureyjum Filippseyja, en þær komu verst út þegar ofurfellibylurinn Haiyan gekk yfir fyrir um ári síðan með þeim afleiðingum að yfir sjö þúsund manns létust.

Stefán Vilhjálmsson er staddur í borginni Sebú á Filippseyjum ásamt konu sinni. Stefán segir eyðilegginguna mikla, sérstaklega þar sem uppbygging eftir Haiyan var stutt komin. Filippseyingar leggist nú á eitt við að senda neyðarbyrgðir til bágstaddra, en hermenn vinna nú að því að hreinsa vegi og flugvelli til að hjálparstarf geti hafist.

„Það er mikið um safnanir hérna og við erum að safna hrísgrjónum og mat til að hjálpa til á þessum svæðum þar sem tjónið er mest. Það er auðvitað erfitt að fá svona yfir sig aftur,“ segir hann.

„Það eru allir að reyna að hjálpa. Þó það séu ekki nema bara nokkrir pakkar af núðlum eða hrísgrjónum, það vilja allir hjálpa,“ bætir hann við.

Mikil óveður og fellibyljir ganga yfir Filippseyjar á hverju ári, en það er talið vera vegna loftslagsbreytinga.