Kinberg Batra verður nýr leiðtogi Moderaterna

Sérstök valnefnd sænska hægriflokksins Moderaterna hefur nú formlega lagt til að Anna Kinberg Batra verði næsti formaður flokksins. Kinberg Batra mun taka við embætti á sérstökum landsfundi í janúar.

Kinberg Batra hefur verið meðal talsmanna flokksins í efnahagsmálum síðastliðin ár og segist sjálf vera vel búin til að takast á við verkefnið. Sagðist hún að mestu ætla byggja á þeirri pólitík sem Fredrik Reinfeldt hafi mótað og leitt síðustu ár.

Reinfeldt tilkynnti að hann hugðist segja af sér formannsembættinu í flokknum eftir tap í þingkosningunum í september, en hann hafði gegnt því embætti frá árinu 2003 og embætti forsætisráðherra frá 2006.

„Stokkhólms-pólitíkus“

Kinberg Batra er 44 ára gömul og hefur setið á þingi frá árinu 2006. Hún er gift David Batra, frægum grínista.

Gagnrýnendur hafa sagt að þeim þyki hún vera helst til of mikill „Stokkhólms-pólitíkus“ og hafa orð hennar í viðtali frá árinu 1998 um að henni þyki „Stokkhólmsbúa gáfaðri en landsbyggðarfólk“ verið rifjuð upp síðustu mánuði. Kinberg Batra segir nú orðin vera þau heimskustu sem hún hafi nokkurn tímann látið út úr sér.

Töpuðu síðustu kosningum

Moderaterna hlaut rúmlega sjö prósent minna fylgi í síðustu kosningum samanborið við kosningarnar 2010. Talið er að flokkurinn hafi misst marga kjósendur til Svíþjóðardemókrata sem eru harðlega andsnúnir núverandi innflytjendastefnu sænskra stjórnvalda. Því er ljóst að Kinberg Batra mun þurfa að kljást við innflytjendamálin á einn eða annan hátt.

Þingkosningar 22. mars

Stefan Löfven forsætisráðherra tilkynnti í síðustu viku að þingkosningar verði haldnar í landinu þann 22. mars. Tilkynningin kom í kjölfar þess að minnihlutastjórn jafnaðarmanna og Græningja mistókst að fá fjárlagafrumvarp sitt samþykkt og meirihluti þingmanna samþykkti frumvarp borgaralegu flokkanna sem eru  í stjórnarandstöðu.

Fyrsta konan í stóli forsætisráðherra?

Kinberg Batra verður önnur konan sem á raunverulega möguleika að taka við forsætisráðherraembætti Svíþjóðar. Sú fyrri var Mona Sahlin, fyrrverandi formaður Jafnaðarmannaflokksins, en flokkur hennar tapaði þingkosningum árið 2010 og sagði hún í kjölfarið af sér sem formaður.

Svíþjóð er eina landið á Norðurlöndum þar sem kona hefur enn ekki skipað embætti forsætisráðherra.