Fyrrum landsliðsmarkvörður Þýskalands fer í Wrestling

Það er misjafnt hvað knattspyrnumenn taka sér fyrir hendur þegar knattspyrnuferlinum lýkur.

Tim Wiese, fyrrum landsliðsmarkvörður Þýskalands, er búinn að vera mikið í ræktinni síðan hann hætti og ætlar að gerast atvinnumaður í sýndaríþróttinni Wrestling.

Hann mun væntanlega koma fram í fyrsta skipti um helgina á Wrestling-kvöldi í Frankfurt. „Bardagi" með honum er ekki á dagskrá en þýskir fjölmiðlar segja að uppákoma verði með honum á milli keppna.

Wiese er enn í viðræðum við alþjóðasambandið, WWE, um samning en þeir eru mjög spenntir að fá hann inn.

Markvörðurinn spilaði átta landsleiki fyrir Þýskaland og lék lengst með Werder Bremen og Hoffenheim.