„Ótrúlegt atvik og vanvirða við fólkið“

Stéttarfélagið Efling telur margt benda til þess að ræstingarfólk sé að fá sig fullsatt af álagi og kröfum um stöðugt aukna vinnu fyrir lægra kaup og verri aðbúnað í erfiðum ræstingarstörfum. Átján ræstingarkonum var sagt upp hjá ríkinu á dögunum. Sáu þær um þrif í byggingum sem falla undir Stjórnarráð Íslands. Sex þeirra voru eldri en 60 ára en sjö á aldrinum 50 til 60 ára.

Á heimasíðu Eflingar kemur fram að stór hópur fólks af erlendum uppruna sinni ræstingarstörfum í kjölfar útboða hjá ríkisfyrirtækjum. Fólkið sé að kikna undan álagi fyrir laun sem eru í mörgum tilvikum undir því lágmarki sem kjarasamningar kveða á um.

„Á Landsspítalanum kom nýlega til áreksturs þegar fulltrúi Eflingar, Harpa Ólafsdóttir, var rekin af fundi þar sem pólskir ræstingarstarfsmenn höfðu óskað eftir nærveru Eflingar,“ segir á vef Eflingar.

Sjá einnig: Ríkið segir upp átján konum

Fram kemur að tólf pólskir starfsmenn sjái um þrif á 26 þúsund fermetra svæði Landspítalans í Fossvogi. Mikil ólga hafi verið undanfarið hjá þessum starfsmönnum vegna álags og bágra kjara. Nú fyrr í nóvembermánuði hafi þeir óskað eftir fundi með yfirmönnum ræstingarfyrirtækisins ásamt túlki og fulltrúa Eflingar.

„Við höfum fylgst með vaxandi óánægju á þessum verkstöðvum ræstingarfólks og brugðumst því hratt við þegar óskað var eftir nærveru Eflingar og stuðnings á fundinum sem fyrirtækið Hreint var með á staðnum, segir Harpa Ólafsdóttir, hagfræðingur Eflingar.

„Þegar til kom var mér sem fulltrúa stéttarfélagsins meinaður aðgangur að fundinum. Þetta var ekki lítið sérkennileg uppákoma og ég hef aldrei sem starfsmaður Eflingar lent í því að vera meinuð aðganga að fundi til að aðstoða félagsmenn. Ótrúlegt atvik og mikil vanvirða við fólkið sem beðið hafði um aðstoð Eflingar á fundinum.“

Sjá einnig: Ræstingarkonurnar fengu 260 þúsund krónur á mánuði

Bendir Harpa á að vanvirðingin sé sérstaklega mikil þar sem enginn trúnaðarmaður sé á staðnum og starfsmenn þekki síður rétt sinn vegna tungumálaörðugleika.

„Þetta varð til þess að þeir ellefu starfsmenn sem mættir voru gengu allir af fundi.“

Að loknu stuttu samtali sem fulltrúi Eflingar tók við starfsmennina með aðstoð túlks var talin full ástæða til að skoða málið betur og er það nú til meðferðar hjá lögmönnum og forystumönnum Eflingar.

Ræstingahópur er sagður hafa setið eftir í launahækkunum. Í nýrri viðhorfskönnun Eflingar kemur fram að um 73% þeirra sem starfa við ræstingar eru með dagvinnulaun undir 250.000 kr. fyrir fullt starf á mánuði. Þá hefur paraður launasamanburður félagsins milli ára fyrir þann hóp félagsmanna sem starfar hjá ræstingafyrirtækjum leitt í ljós að þessi hópur hefur hækkað hvað minnst milli ára af einstökum starfahópum eða um 2,4% frá 2013 til 2014.