Dæmdir í fangelsi fyrir að sjást við giftingu samkynhneigðra

Dómstóll í Egyptalandi hefur dæmt átta karlmenn til átta ára fangelsisvistar fyrir að koma fram í myndbandi sem talið er sýna hjónavígslu tveggja samkynhneigðra manna.

BBC greinir frá. Þótt samkynhneigð sé ekki ólögleg í Egyptalandi ríkir talsverð bannhelgi í kringum hana og hefur lögregla þar í landi hert aðgerðir gegn samkynhneigðum talsvert undanfarna mánuði.

Myndbandinu var hlaðið inn á YouTube í september. Í því sjást tveir menn skiptast á hringum á siglingu á ánni Níl. Að sögn fréttamanns BBC var það samfélag íslamista í Egyptalandi sem hneykslaðist hvað helst á birtingu myndbandsins og hélt því fram að það væri til marks um hnignandi siðferðiskennd í landinu eftir að Móhammed Morsi forseti var sviptur völdum.