Lést eftir að hafa drukkið 56 staup

Lögregla í Frakklandi rannsakar nú dauða manns á sextugsaldri sem lést í síðustu viku eftir að hafa drukkið 56 staup af sterku áfengi í drykkjukeppni. Nafn mannsins hefur ekki verið gefið upp en hann ku hafa verið að reyna að slá fyrra drykkjumet barsins, 55 staup.

„Hann drakk um það bil þrjátíu staup á einni mínútu,“ segir fulltrúi lögreglunnar í samtali við fréttaveituna AFP.

Drykkjukeppnin átti sér stað á bar í bænum Clermont-Ferrand. Maðurinn fékk far heim eftir keppnina og var síðar um kvöldið fluttur á bráðamóttöku. Hann lést daginn eftir úr hjartaáfalli. Niðurstöðu krufningar er enn beðið en svo gæti farið að eigandi barsins verði kærður fyrir að stöðva ekki manninn þegar hann var í bráðri hættu.