Í ársfangelsi fyrir að horfa á blakleik

Íranska konan Ghoncheh Ghavami hefur verið dæmd í ársfangelsi fyrir að horfa á blakleik í Íran. Lögmaður hennar segir hana hafa verið dæmda fyrir dreifingu áróðurs gegn trúnni. Yfirvöld í Íran bönnuðu konum að horfa á blakleiki árið 2012, en áður hafði þeim verið bannað að horfa á fótboltaleiki um árabil.

Yfirvöld segja bannið til varnar konum gegn karlkyns íþróttaáhugamönnum, samkvæmt BBC.

Ghoncheh, sem er af breskum ættum og með tvöfalt ríkisfang, var í hópi tuttugu kvenna sem fóru á leik karlalandsliðs Íran gegn Ítalíu í blaki þann 20. júní. Þær voru allar handteknar og eru sagðar hafa orðið fyrir ofbeldi áður en þeim var sleppt úr haldi.

Hún var svo handtekin aftur og ákærð. Eftir að hún hafði verið í einangrun um langt skeið fór hún í hungurverkfall í síðasta mánuði. Bróðir hennar sagði BBC að ástand hennar væri mjög slæmt.

Amnesty International hefur kallað eftir því að Ghoncheh verði sleppt úr haldi en rúmlega 700 þúsund manns hafa skrifað undir áskorun til yfirvalda í Íran.