Þrír látnir eftir skotárás í svissneskum alpabæ

Þrír eru látnir eftir skotárás sem átti sér stað í svissneska alpabænum Wilderswil í morgun. Óstaðfestar fréttir herma að hin látnu tengist fjölskylduböndum og að sambandsdeilur hafi legið að baki árásinni.

Lögregla hefur lokað stóru svæði nálægt skóla og brautarstöð bæjarins. Í frétt The Local segir að hin látnu séu tveir karlmenn og ein kona.

Að sögn heimildarmanna svissneskra fjölmiðla eru hin látnu öll af portúgölsku bergi brotin. Árásarmaðurinn á að hafa svipt sig lífi eftir að hafa skotið fyrrverandi eiginkonu sína og sambýlismann hennar til bana fyrir utan brautarstöð Wilderwil.

Að sögn sjónarvotta fannst árásarmaðurinn látinn inni í bíl sínum, en fórnarlömbin tvö í blóði sínu úti á götu.

Um 2.500 manns búa í bænum Wilderswil sem er staðsettur í um 500 metra hæð, um 5 kílómetrum frá borginni Interlaken í kantónunni Bern.