Bandaríkjamenn flykkjast á kjörstað

Milljónir Bandaríkjamanna hafa mætt á kjörstað það sem af er degi en bandaríska þjóðin kýs meðal annars um fulltrúa í fulltrúadeild og öldungadeild þingsins í dag.

Repúblikanar stjórna nú fulltrúadeild Bandaríkjaþings og bendir ekkert til að breyting verði þar á. Hins vegar er mikil spenna um hvort Demókratar missi meirihluta sinn í öldungadeild þingsins. Sérstaklega er fylgst með kjöri fulltrúa til öldingadeildar í Norður-Karólínu, Arkansas, Colorado, Georgíu, Iowa og Kansas.

Repúblikanar þurfa aðeins að bæta við sig sex sætum til að ná meirihluta í öldungadeildinni og takist það, mun það draga úr völdum Barack Obama Bandaríkjaforseta sem er Demókrati. Rúmlega helmingur er nú eftir af síðara kjörtímabili hans en kosið verður um nýjan forseta í nóvember 2016.

Repúblikaninn og öldungadeildarþingmaðurinn Rand Paul lýsti um helgina kosningum dagsins sem þjóðaratkvæðagreiðslu um forsetann. Paul er af mörgum talinn líklegur til að bjóða sig fram til forseta í næstu forsetakosningum fyrir hönd Repúblikana.

Vinsældir Obama hafa sjaldan verið minni og er talið líklegt að það bitni á frambjóðendum Demókrata í kosningunum í dag.