Pórósjenkó sendir hersveitir til austurhluta Úkraínu

Petró Pórósjenkó Úkraínuforseti hefur fyrirskipað her landsins að auka viðbúnað sinn og fjölga í herliði í hernaðarlega mikilvægum borgum í austurhluta landsins. Er þetta gert vegna möguleika á nýrri sókn aðskilnaðarsinna.

Í frétt BBC kemur fram að Pórósjenkó segi að stjórnarherinn skuli leggja áherslu á að verja borgirnar Mariupol, Berdyansk, Kharkiv og norðurhluta Luhansk-héraðs.

Forsetinn ræddi við fjölmiðla að loknum fundi hans og yfirmanna hersins sem haldinn var fyrr í dag vegna umdeildra kosninga í héröðunum Donetsk og Luhansk sem fram fóru um helgina. Úkraínustjórn og bandamenn hennar á Vesturlöndum hafa fordæmt framkvæmd kosninganna.

Pórósjenkó sagðist vera fylgjandi núgildandi friðarsamkomulagi en að hann íhugi að hætta við að veita Donetsk og Luhansk aukna sjálfstjórn líkt og samkomulagið gerir ráð fyrir.

Tilkynnt var um friðarsamkomulagið þann 5. september síðastliðinn eftir margra mánaða átök úkraínska stjórnarhersins og aðskilnaðarsinna á bandi Rússlandsstjórnar.