Repúblikönum spáð góðu gengi

Milljónir Bandaríkjamanna ganga að kjörborðinu í dag þegar kosið er um fulltrúa í fulltrúadeild og öldungadeild þingsins. Líklegt þykir að óvinsældir Bandaríkjaforseta komi til með að bitna á frambjóðendum demókrata.

Fyrirfram var því spáð að kosningaþátttaka yrði heldur dræm. Skoðanakannanir benda til að auk þess að halda völdum sínum í fulltrúadeild þingsins komi Repúblikanar til með að ná meirihluta í öldungadeildinni.

Ástæðuna má meðal annars rekja til aukinna óvinsælda demókratans Barack Obama, en líklegt er að síðari hluti kjörtímabils hans gæti reynst forsetanum erfiður gangi spár eftir.