Vildi reyna hómópatískar aðferðir gegn Ebólu

Steffan Browning, þingmaður Græna flokksins í Nýja-Sjálandi, hefur verið lækkaður í tign innan flokksins eftir að hann studdi tillögu á netinu um að reyna hómópatískar aðferðir í baráttunni gegn Ebólufaraldrinum.

The New Zealand Herald greinir frá. Metiria Turei, leiðtogi Græna flokksins, segir að með þessu sé verið að undirstrika þá afstöðu flokksins að styðjast eigi við þær aðferðir sem vísindalegar rannsóknir liggja á bak við þegar kemur að heilbrigðismálum. Browning segist sjálfur ekki andvígur hómópatíu en að hann sætti sig við ákvörðun flokksins.

Ráðherrar úr ríkisstjórn Nýja-Sjálands voru meðal þeirra sem fordæmdu tillöguna í síðustu viku. John Key forsætisráðherra lét þau orð falla að það væri „hreint brjálæði“ að stinga upp á þessu og Jonathan Coleman heilbrigðisráðherra sagði hugmyndina „mjög, mjög hættulega.“