Pútín valdamesti maður heims

Bandaríska tímaritið Forbes segir Vladimír Pútín Rússlandsforseta vera valdamesta mann heims, en árlegur listi tímaritsins var kynntur í gær.

Barack Obama Bandaríkjaforseti skipar annað sæti listans, Xi Jinping Kínaforseti þriðja sætið og Frans páfi fjórða.

Í grein Forbes segir að enginn myndi kalla Pútín „góðan gæja“ og er bent á að það sem af er ári hefur Rússland undir hans stjórn innlimað Krímskaga og átt í sóðalegri deilu við Úkraínu þar sem uppreisnarmenn á bandi Rússlandsstjórnar hafi skotið niður farþegavél. „En sem óumdeildur, ófyrirsjáanlegur og óútskýranlegur leiðtogi ríkis, ríkt af auðlindum og sem býr yfir kjarnavopnum, myndi enginn kalla hann veikan.“

Alls eru 72 sem skipa listann, þar af sautján þjóðarleiðtogar og 39 forstjórar stórfyrirtækja. Þetta er annað árið í röð þar sem Pútín skipar efsta sæti listans. Tólf koma nýir inn á listann, þar á meðal Narendra Modi, forsætisráðherra Indlands, Abdel el-Sisi, forseti Egyptalands og Jack Ma, ríkasti maður Kína og stofnandi Alibaba.

Alls eru níu konur á listanum og er í fyrsta sinn að finna tvær konur í tíu efstu sætum listans - þær Angelu Merkel Þýskalandskanslara og Janet Yellen, seðlabankastjóra Bandaríkjanna. Yngsti maðurinn á lista er Mark Zuckerberg, stofnandi Facebook, sem skipar 22. sæti listans.

Eftirfarandi skipa tíu efstu sæti lista Forbes:

1. Vladimír Pútín Rússlandsforseti

2. Barack Obama Bandaríkjaforseti

3. Xi Jinping Kínaforseti

4. Frans páfi

5. Angela Merkel Þýskalandskanslari

6. Janet Yellen, seðlabankastjóri Bandaríkjanna

7. Bill Gates, stofnandi Microsoft

8. Mario Draghi, seðlabankastjóri evrópska seðlabankans

9.-10. Larry Page og Sergey Brin, stofnendur Google.

Sjá má listann í heild sinni í frétt Forbes.