Björguðu munaðarlausum sæotri

Nýjasti íbúi Shedd sædýrasafnsins í Chicago er fimm vikna gamall, munaðarlaus sæotur sem fannst við strendur Kaliforníu fyrir skemmstu.

Dýrið hefur fengið nafnið Pup681 og var um 2,5 kíló þegar hann fannst á Coastways ströndinni milli San Mateo og Santa Cruz. Hann var fluttur til Chicago og segja starfsmenn sædýrasafnsins að hann braggist vel.

Sæotrar eru í útrýmingarhættu, en á vef Vísindavefsins segir að þeir séu afar athafnasamir og félagslyndir og mynda hópa þótt þeir kjósi oft að vera einir og út af fyrir sig.

Í myndskeiðinu að neðan má sjá hvernig starfsmenn sædýrasafnsins í Chicago stjana við Pup681.