Fékk ekki kennslustarf út af drykkju Íra

Írskum kennara sem sótti um starf í Suður-Kóreu var hafnað vegna tilhneigingu Íra til drykkju. Þetta kom fram í bréfi sem henni barst þegar henni var tilkynnt að hún hefði ekki fengið starfið.

Kennarinn, sem heitir Katie Mulrennan, segir í samtali við BBC að hún hafi í fyrstu ekki trúað því sem stóð í bréfinu. Hún segist aldrei hafa fengið viðbrögð sem þessi.

„Venjulega þegar þú sækir um starf þar sem þér er hafnað fær maður ekki svar,“ segir hún. „Eða þá að þeir segja þér að þeir vilji frekar einhvern frá Norður-Ameríku af því að skólinn vilji frekar þann hreim.“

Bréfið sem hún fékk var nokkuð skýrt en í því stóð einfaldlega: „Mér þykir leitt að tilkynna þér að skjólstæðingur minn ræður ekki írskt fólk vegna tilhneigingar fólks af þínum uppruna til alkóhólisma.“

Þetta viðmót skólans sem hún sótti um hjá hefur hinsvegar ekki dregið úr ást hennar á Suður-Kóreu. „Ég elska landið og að vera í Seúl,“ segir hún.