Obama lætur Michael Jordan heyra það

Barack Obama Bandaríkjaforseti svaraði körfuboltagoðsögninni fullum hálsi í útvarpsviðtali í vikunni. Fyrr í vikunni birtist viðtal við Michael Jordan þar sem hann sagði að Obama væri lélegur í golfi. Sérstaka athygli vakti að orðalag Jordan var heldur ódannað. Í fyrradag svaraði Obama svo fyrir sig og hafa fjölmiðlar keppst um að ráða í orð forsetans.

Hér má sjá upphaflegu ummæli Jordan og umfjöllun CBS sjónvarpsstöðvarinnar um málið.

Jordan var í viðtali hjá góðvini sínum Ahmad Rashad, sem körfuboltaunnendur muna líklega eftir sem stjórnanda hinna vinsælu þátta NBA Inside Stuff. Þar var Jordan beðinn um að nefna þá sem hann vildi helst spila golf með. Hann nefndi Obama, en hætti svo við og kallaði hann lélegan golfara og notaði orð sem þurfti að taka út úr viðtalinu. Jordan tók þó skýrt fram að hann væri einungis að ræða um hæfileika forsetans í golfi en að hann væri ekki að setja út á störf hans sem stjórnmálamaður.

Í fyrradag birtist svo viðtal við forsetann. Þar sagði hann meðal annars: „Við Michael þekkjumst en við höfum aldrei spilað golf saman.“ Hann bætti við: „Ég held að hann hafi bara verið að reyna að auka áhorfið á þáttinn hans Ahmad. En það er samt enginn vafi á því að Jordan sé betri golfari en ég. Ef ég hefði spilað golf tvisvar á dag síðastliðin fimmtán ár væri það kannski eitthvað öðruvísi.“ 

Hér má hlusta á viðtalið.

Obama lét þetta ekki nægja: „Hann ætti kannski að eyða meiri tíma í að hugsa um Bobcats-liðið, eða Hornets öllu heldur.“ Þar vísaði forsetinn til þess að Jordan er eigandi NBA-liðsins Charlotte Hornets, sem hét áður Charlotte Bobcats.

Fjölmiðlar vestanhafs hafa keppst um að ráða í þessi orð forsetans. Blaðamaður USA Today segist ekki vera viss um hvort Obama hafi ruglast og haldið að liðið í Charlotte héti ennþá Bobcats, eða þá að hann væri að skjóta á Jordan fyrir að hafa breytt nafninu. „Hvernig sem það er, þá var þessi lína stórkostleg,“ segir Chris Chase blaðamaður. Eins og frægt er Barack Obama mikill áhugamaður um körfubolta og lék sjálfur á sínum tíma.

Jalen Rose, fyrrum NBA-stjarna og fjölmiðlamaður, heldur úti vinsælum þætti á íþróttavefnum Grantland. Í síðasta þætti, sem birtist á síðunni í gærkvöldi, fjallaði Rose um þessi ummæli. Hann sagði að Obama væri að skjóta fast á Jordan fyrir spilamennskuna hjá Washington Wizards og hversu illa Jordan hefur gengið sem eiganda NBA-liðs. Hann sagðist ánægður að forsetinn svaraði svona fyrir sig og léti einn mesta töffara íþróttasögunnar í Jordan heyra það.