Lögreglustjórar ákveða hvort hríðskotabyssur verði í lögreglubílum

Norska lögreglan gaf þeirri íslensku 150 hríðskotabyssur á síðasta ári sem ætlaðar eru til nota almennu lögreglunnar og leysa af hólmi vopn sem sum eru allt frá því á stríðsárunum. Yfirlögregluþjónn hjá Ríkislögreglustjóra segir það undir einstökum lögreglustjórum hvort vopnin séu höfð í lögreglubílum en þau séu það ekki á höfuðborgarsvæðinu.

DV greinir frá því í dag að lögreglan hafi keypt 200 MP5 vélbyssur og nokkuð magn af Glock skammbyssum og til standi að þessi vopn verði í öllum lögreglubílum landsins. Jón Bjartmarz yfirlögregluþjónn hjá Ríkislögreglustjóra segir þetta ekki rétt.

„Það stendur ekki til og það er háð ákvörðun lögreglustjóranna sjálfra hvort þeir telji þörf á því,“ segir Jón.

Hvað eru þetta margar byssur og hvaðan koma þær og þurfti lögreglan að greiða mikið fyrir þær?

„Nei, það vildi svo til að við fengum þær frá Noregi sem gjöf. Það hitti þannig á að viðkomandi aðilar voru að afleggja notkun á þessari tegund af vopnum og skipta yfir í aðra tegund,“ segir Jón.

Norðmenn hafi gefið íslensku lögreglunni 150 hríðskotabyssur og hafi 35 þeirra verið teknar í notkun við þjálfun. Það sé því ekki rétt að lögregla hafi notað viðbótarfjármagn til uppbyggingar lögreglunnar í kaup á vopnum. Síðast hafi verið keyptar skammbyssur árið 2012 og enginn vilji til að lögreglumenn verði almennt vopanðir.

Megum við búast við því t.d. hér á höfuðborgarsvæðinu að lögregla hafi þessi vopn í bílunum?

„Nú er rétt að taka fram að lögreglan hefur alla tíð haft aðgang að vopnum. Þau hafa hins vegar að jafnaði verið staðsett á lögreglustöðvum. Þau hafa í raun alltaf verið til þess að lögreglan geti vopnast þegar um það er að ræða að þörf er á umfangsmiklu öryggisgæsluverkefni, t.d eins og á NATO fundinum 2002. Og eins til þess að geta vopnast þegar um byssumál er að ræða. Það er ekki forsvaranlegt að senda óvopnaða lögreglumenn á móti mönnum vopnuðum skotvopnum,“ segir Jón.

Enginn vilji sé hins vegar til að lögreglumenn verði almennt vopnaðir.

„Nú er það alveg skýr stefna og vilji yfirmanna lögreglu og lögreglumanna að lögreglan gangi ekki um vopnuð dagsdaglega. Það eru engar raddir um að hún ætti að gera það,“ segir Jón.

Vegna fjarlægða séu skammbyssur í lögreglubílum sumstaðar á landsbyggðinni og þá í læstum hólfum og ekki megi grípa til þeirra nema með leyfi yfirmanna.

„Sérsveitin er náttúrlega búin að vera með vopn í útkallsbílunum allt frá árinu 1992. En það eru nokkur ár síðan nokkur lögreglulið úti á landi færðu skammbyssur af lögreglustöðvum út í bíla. Þá er það sérstaklega þar sem vegalengdir eru miklar en það eru ekki öll lögreglulið,“ segir Jón og þannig sé það ekki hjá lögreglunni á höfuðborgarsvæðinu.