Harper segir að öfgamenn muni ekki hræða Kanadamenn

Stephen Harper, forsætisráðherra Kanada, segir að landsmenn muni aldrei láta öfgamenn hræða sig en á síðustu dögum hafa tvær árásir verið gerðar á kanadíska hermenn. Í gær var hermaður skotinn til bana fyrir utan þinghús landsins og fór árásarmaðurinn síðan rakleitt inn í þinghúsið þar sem hann var felldur af lögreglu.

Á mánudag var annar hermaður myrtur þegar ekið var yfir hann. Í báðum tilvikum voru árásarmennirnir Kanadamenn sem höfðu snúist til öfgafullrar íslamstrúar. Talið er að árásirnar séu svar við yfirlýsingum kanadamanna frá því á dögunum þegar þeir tilkynntu um að kanadíski herinn myndi taka þátt í herleiðangri Bandaríkjamanna gegn Ísis samtökunum í Írak.