Lögreglumaður stal nektarmyndum af stútum

Kona sem handtekin var fyrir ölvunarakstur hefur kvartað yfir því að lögreglumaður sem handtók hana sendi sjálfum sér nektarmyndir úr síma hennar. Á meðan hann fór yfir síma hennar sat hún í fangaklefa. Lögreglumaðurinn segir þetta gerast reglulega meðal lögreglumanna og sjálfur hafi hann gert þetta minnst sex sinnum.

Yfirvöld rannsaka nú hvort kæra eigi lögreglumanninn, en ölvunarakstur konunnar hefur verið látinn niður falla. Þrátt fyrir að áfengismagn í blóði hennar hafi verið þrefalt hærra en löglega hámarkið.

Lögreglumaðurinn Sean Harrington handtók 23 ára konu fyrir ölvunarakstur í Kaliforníu í ágúst. Hún gaf honum upp lykilorð símans svo hann gæti fundið símanúmer fyrir hana. Þá sendi hann sjálfum sér minnst sex nektarmyndir sem voru í iPhone síma hennar.

Þetta kemur fram á vef Contra Costa Times.

Hann eyddi öllum gögnum um sendingarnar úr símanum, en konan tók eftir því í iPadinum sínum fimm dögum seinna, sem er samtengdur símanum. Hún fletti upp símanúmerinu sem myndirnar voru sendar í og komst að því að það var skráð á Harrington.

Líta á þetta sem leik

Samkvæmt San Jose Mercury News viðurkenndi Harrington að hann og aðrir lögreglumenn hafi stundað þetta um árabil og líti á þetta sem leik.

Hann sagði lögreglumönnum sem rannsaka málið að hann hefði fyrst gert þetta þegar hann starfaði í Los Angeles. Þá hafi aðrir lögreglumenn kynnt honum fyrir þessum „leik“ þar sem þeir leiti í símum kvenna sem hafa verið handteknar eftir nektarmyndum og sendi öðrum lögreglumönnum myndirnar.

Í nýjum dómsgögnum sem San Jose Mercury blaðið hefur undir höndunum er vísað til annars máls þar sem lögreglumaður sendi öðrum myndir af 19 ára stúlku á bikíní með textanum: „Tók þetta úr síma 10-15x á meðan hún er í röntgen.“ SJM segir að konan hafi lent í árekstri og verið á sjúkrahúsi þegar myndin var send.

Sá sem tók við myndinni svaraði og spurði hvort það væru engar almennilegar nektarmyndir í símanum.

Hér má sjá frétt ABC um málið