Refum fækkar ört á Íslandi

Refum er farið að fækka á Íslandi eftir samfelldan vöxt um áratugaskeið.

Samkvæmt nýju mati Náttúrufræðistofnunar voru um þriðjungi færri dýr í stofninum en þegar hann var síðast metinn árið 2010. Fækkunin tekur jafnt til þeirra svæða þar sem refurinn er veiddur og til friðlanda eins og á Hornströndum en þar varð hrun í stofninum árið 2014.

Í fréttatilkynningu Náttúrufræðistofnunar eru ástæður þessarar stofnbreytingar óþekktar en tengjast líklega veðurfari, fæðuskilyrðum, heilbrigði dýranna og jafnvel aðbornum mengunarefnum. „Veiðimenn eru lykilaðilar í vöktun og rannsóknum á refastofninum en þeir senda hræ af felldum dýrum til krufninga og aldursgreiningar,“ segir í tilkynningunni.

Nýjustu útreikningar á stærð íslenska refastofnsins sýna að refum hefur fækkað talsvert á undanförnum árum. „Er þetta í fyrsta skipti síðan mælingar hófust að refum fækkar á landinu. Haustið 2007 hafði stofninn verið í samfelldum vexti í meira en 30 ár og var orðinn ríflega áttfalt stærri en í upphafi vöktunarinnar árið 1979. Um þær mundir var íslenski  refastofninn að rétta úr sér eftir að hafa verið í sögulegu lágmarki.“

Náttúrufræðistofnunin  segir stofnbreytinguna vera misjafna og að fjölgunin hafi farið rólega fram fyrstu 15 til 20 árin. „Árið 1997 fór stofninn að vaxa hraðar en á þeim tíma var áhersla aukin á vetrarveiði þó grenjavinnsla hafi ekki minnkað að sama skapi. Enn hraðari aukning varð eftir 2004 og náði hún hámarki árið 2008. Næstu tvö árin, 2009 og 2010, fækkaði refum mikið eða um 32% á landinu í heild. Vísbendingar eru um að fækkunin hafi haldið áfram næstu ár, 2011-2014, en ekki er hægt að fullyrða að svo hafi verið á þessu stigi.“

.