Slapp naumlega þegar stærðarinnar glerrúða féll til jarðar

Upptaka úr öryggismyndavél fyrir utan heimavöll Shaktar Donetsk í austurhluta Úkraínu sýnir hvernig ung stúlka sleppur naumlega frá stærðarinnar rúðu sem fellur til jarðar úr hlið leikvangsins.

Myndskeiðið, sem sjá má að neðan, sýnir hvernig glerið fellur hársbreidd frá stúlkunni eftir að skeyti var skotið á Donetsk Donbass völlinn á mánudaginn var. Má sjá hvernig stúlkan forðar sér svo að því loknu inn í leikvanginn.

Átök hafa staðið í Donetsk síðastliðna mánuði og hefur vopnahlé úkraínskra stjórnvalda og aðskilnaðarsinna á bandi Rússlandsstjórnar margoft verið brotið.