Krefjast dauðarefsingar yfir skipstjóranum

Saksóknari í Suður-Kóreu hefur krafist dauðarefsingar yfir skipstjóra ferjunnar sem sökk undan ströndum landsins þann 16. apríl. 304, langflestir skólabörn, létust eða eru enn týndir. Fimmtán manna áhöfn ferjunnar náði að flýja áður en ferjan sökk. Guardian greinir frá.

Mikil reiði er meðal almennings í Suður-Kóreu vegna þess hvernig hinn 68 ára gamli skipstjóri Lee Joon-seok, stóð að málum. Hann var einn þeirra fimmtán sem flúðu ferjuna eftir að hafa sagt farþegum að halda kyrru fyrir í herbergjum sínum.

Joon-seok er einn fjögurra sem ákærður er fyrir manndráp. Farið er fram á lífstíðarfangelsi yfir hinum þremur meðlimum áhafnarinnar. Nokkrir hafa verið dæmdir til dauða í Suður-Kóreu undanfarin ár. Síðasta aftaka fór fram árið 1997.