Fjórtán ára stúlka látin eftir skotárás í skóla

Gia Soriano lést á sjúkrahúsi í gær eftir að hafa særst í skotárás í skóla í Washington ríki í Bandaríkjunum í gær. Þrír eru nú látnir vegna árásarinnar. Þrír nemendur til viðbótar liggja á gjörgæslu eftir árásina en árásarmaðurinn lést í árásinni.

„Við erum miður okkar vegna þessa óskiljanlega harmleiks,“ segir fjölskylda Giu í tilkynningu. „Gia er okkar fallega dóttir og orð geta ekki lýst því hve mikið við munum sakna hennar.“

Önnur stúlka lést í árásinni sjálfri sem og árásarmaðurinn, Jaylen Fryberg. Hann lést í átökum við kennara en ekki liggur fyrir hvort hann hafi skotið sig viljandi eða skot hafi hlaupið af í átökunum, samkvæmt AP fréttaveitunni.

Samkvæmt BBC hefur Fryberg verið lýst sem vinsælum og opnum dreng. Færslur sem hann birti þó skömmu fyrir árásina gefa í skyn að einhver nýlegur atburður hafi haft mikil áhrif á hann.

Nemandi við skólann sagði Reuters fréttaveitunni að árásin væri tengd sambandsvandræðum.