Nýsjálendingar ætla að kjósa um fánann

Nýsjálendingar hafa ákveðið að halda þjóðaratkvæðagreiðslu árið 2016 þar sem kosið verður um hvort þjóðin breyti fána sínum. Nefnd nokkurra valinkunnra Nýsjálendinga hefur þegar verið sett á laggirnar og er henni ætlað að koma með nokkrar tilllögur að nýjum fána, en málið hefur verið mikið í umræðunni í landinu síðustu misserin.

John Key forsætisráðherra segist þeirrar skoðunar, eins og raunar margir kjósenda hans, að best færi á því að á fánanum yrði silfurlitaður burkni, á svörtum grunni. Slíkur fáni er jafnan notaður á íþróttakappleikjum þegar verið er að hvetja nýsjálensk landslið og nýtur hann gríðarlegra vinsælda í landinu.