Klas Ingesson dó í nótt

Klas Ingesson, fyrrum landsliðsmaður Svía og þjálfari sænska liðsins Elfsborg, lést í nótt eftir baráttu við krabbamein. Þetta kemur fram í sænskum fjölmiðlum.

Ingesson var aðeins 46 ára gamall en hann greindist fyrst með krabbameinið árið 2009 og taldi sig hafa sigrast á því þegar hann tók við unglingaliði Elfsborg árið 2010.

Ingesson tilkynnti í ársbyrjun 2013 að krabbameinið hafi komið aftur og hann tók síðan við liði Elfsborg um haustið 2013.

Ingesson var hættur að þjálfa lið Elfsborg þegar hann lést en það er búist við að Magnus Haglund, fráfarandi þjálfari norska liðsins Lilleström, taki við liðinu. Haglund þjálfaði frá 2004 til 2011.

Ingesson skoraði 13 mörk í 57 landsleikjum fyrir Svía en hann vann brons með sænska landsliðinu á HM í Bandaríkjunum árið 1994. Á sínum fótboltaferli spilaði Ingesson í Svíþjóð, Belgíu, Hollandi, Englandi, Ítalíu og í Frakklandi.