Eins og að ganga yfir jarðsprengjusvæði að setja á launaþak

Frank Lampard, miðjumaður Manchester City, segist skilja áhyggjur stuðningsmanna liðanna í ensku úrvalsdeildinni yfir háu miðaverði.

Hann veit þó ekki hvort hægt verði að setja launaþak á liðin í úrvalsdeildinni, en könnun BBC leiddi í ljós að ensku liðin eyða 71 prósenti af hverju pundi sem þau afla í laun leikmanna.

„Það gæti verið eins og að ganga yfir jarðsprengjusvæði að reyna það. Það er kannski eitthvað sem hægt er að skoða, en ég veit ekki hvort það er mögulegt,“ segir Frank Lampard við BBC.

Hann segir stuðningsmenn liðanna skipta öllu máli og er ánægður með stórlið eins og Chelsea og Manchester City sem eru að reyna að hækka ekki miðaverð enn frekar.

„Ef það eru ekki stuðningsmenn í stúkunni sem búa til þessa ótrúlegu stemningu sem við þekkjum á Englandi þá verða ekki til þessir sjónvarpspeningar,“ segir hann.

„En nú er ég búinn að spila með Chelsea og Manchester City, tveimur af stærstu félögum Englands, og þau hafa tekið stórstígum framförum að undanförnu.“

„Þau eru að reyna að frysta miðaverðið og búa til allskonar pakka sem gera hvaða fólki sem er kleift að komast á völlinn.“