Stytta af fyrsta þeldökka atvinnumanninum í fótbolta afhjúpuð

Í dag verður tæplega fimm metra há stytta af markverðinum Arthur Wharton afhjúpuð í Burton á Englandi. Styttan sýnir Wharton skutla sér aftur á bak og slá bolta yfir þverslá. Wharton þessi er jafnan talinn fyrsti blökkumaðurinn sem var atvinnumaður í fótbolta og sá fyrsti sem lék í ensku deildakeppninni.

Wharton fæddist í Jamestown í Ghana (eða Gullströndinni eins og landið nefndist þá) og kom upphaflega til Englands 1882 til að læra til trúboða.

Hann sneri sér þó fljótlega að íþróttum, en auk þess að vera fótboltamaður var hann liðtækur hlaupari, hjólreiðamaður og krikketspilari. Wharton var t.a.m. sá fyrsti á Englandi sem hljóp 100 metra á undir tíu sekúndum.

Wharton spilaði sem áhugamaður með Darlington og Preston North End og sem atvinnumaður með Rotherham Town og Sheffield United.

Wharton varð gjaldþrota 1899, átti við drykkjuvandamál að stríða, en hann lauk ferlinum hjá Stockport County 1902. Eftir að knattspyrnuferlinum lauk starfaði hann í kolanámu. Wharton dó í fátækt 1930.

Hugmyndin að styttunni er komin frá listamanninum Shaun Campbell sem kynntist sögu Wharton fyrir sjö árum og ákvað í kjölfarið að heiðra minningu hans með því að reisa styttu af honum.

Hugmyndin komst þó ekki framkvæmd fyrr en nokkrum árum síðar. Árið 2012 afhenti Campbell Sepp Blatter, forseta FIFA, módel af styttunni og nú tveimur árum seinna er hún loks komin upp í fullri stærð.