Tvö sjálfsmörk í stórsigri Rússa

Rússland vann öruggan sigur á Lichtenstein með fjórum mörkum gegn engu í G-riðli undankeppni EM 2016 á Arena Khimki í Rússlandi í dag.

Rússar tóku forystuna strax á 4. mínútu þegar miðvörðurinn Sergei Ignashevich átti skot beint úr aukaspyrnu sem fór af Martin Büchel og í markið.

Rússar voru mun sterkari aðilinn og fengu frábær færi til að auka við muninn. Aleksandr Kokorin, leikmaður Dynamo Moskvu, voru mislagðir fætur upp við mark Lichtenstein og svo varði Peter Jehle, markvörður gestanna, frábærlega skot Alans Dzagoev fyrir utan vítateig.

Staðan var 1-0 í hálfleik, en Rússar tvöfölduðu forystuna á. Dzagoev komst þá einn í gegnum vörn Lichteinstein, Jehle varði skot hans en boltinn hrökk í Mario Frick og þaðan í markið. Ótrúleg óheppni hjá lánlausu liði gestanna.

Rússar fengu svo vítaspyrnu fjórum mínútum síðar sem vinstri bakvörðurinn Dmitri Kombarov skoraði úr.

Artem Dzyuba, sem kom inn á sem varamaður í hálfleik, fiskaði vítaspyrnuna og um tíu mínútum síðar átti hann skalla í slána og í kjölfarið annan skalla sem Jehle varði.

Á 65. mínútu kom Dzyuba boltanum svo loks í netið eftir sendingu Kokorins.

Fleiri urðu mörkin ekki og Rússar fögnuðu öruggum sigri. Þeir sitja í toppsæti riðilsins sem inniheldur auk Rússa og Lichtenstein, Austurríki, Svartfjallaland, Moldavíu og Svíþjóð.