18 manns fundust látin í uppblásnum björgunarbáti

Meðlimir ítölsku strandgæslunnar fundu 18 lík um borð í uppblásnum báti á Miðjarðarhafinu í dag. Um 3.500 manns var bjargað úr bátum á svæðinu um helgina. Langflestir þeirra eru á flótta frá Norður-Afríku. Innanríkisráðherra Ítalíu hefur ítrekað að Evrópusambandið þurfi að grípa til aðgerða.

AP fréttaveitan segir frá því að um hundrað þúsund hælisleitendur hafi komið að landi á Ítalíu það sem af er ári. Stjórnvöld þar í landi segjast eyða 9,5 milljónum evra á ári, jafnvirði tæplega einum og hálfum milljarði króna, vegna aukins eftirlits í lofti og á láði. Viðbúnaðurinn var aukinn eftir að 360 hælisleitendur drukknuðu við eyjuna Lampedusa í október.

Angelino Alfano, innanríkisráðherra, segir að Ítalir muni grípa til eigin ráða komi Evrópusambandið ekki til aðstoðar.

Cecilia Malmstrom, innanríkismálaráðherra ESB, hefur þakkað Ítölum fyrir aðgerðir þeirra til bjargar mannslífa. Segir í tilkynningu að fundað verði með Alfano um forgangsröðun og aðstoð.