Hólmar Örn á leið til Rosenborg

Varnarmaðurinn Hólmar Örn Eyjólfsson gengur í raðir norska stórliðsins Rosenborg á næstu dögum, en frá þessu greinir 433.is.

Hólmar hefur verið án félags síðan samningur hans hjá þýska liðinu Bochum rann út, en þessi 24 ára gamli leikmaður var á mála hjá West Ham á Englandi í þrjú ár.

Rosenborg er langsigursælasta félag norska fótboltans, en það hefur unnið úrvalsdeildina þar í landi 22 sinnum. Það varð meistari þrettán sinnum í röð á árunum 1992-2004. Rosenborg varð síðast meistari í fyrra.

Hólmar hefur spilað fyrir öll yngri landslið Íslands auk þess á hann einn leik með A-landsliðinu.