Norðmenn geta lært mikið af Íslendingum

„Við trúum þessu varla sjálfir. Þetta er alveg ótrúlegt,“ segir Veigar Páll Gunnarsson, leikmaður Stjörnunnar, í viðtali við norska blaðið Verdens Gang um velgengni Garðabæjarliðsins í Evrópudeildinni.

Stjarnan er komin í umspil Evrópudeildarinnar í frumraun liðsins í Evrópukeppni, en aldrei áður hefur íslenskt lið unnið þrjú einvígi í Evrópu.

Verdens Gang fjallar um málið í ljósi þess að öll norsku liðin eru úr leik í Evrópu eftir fimmtudagskvöldið, en Strömsgodset, Haugesund, Tromsö, Molde og Rosenborg eru öll úr leik.

Aldrei hefur það gerst áður að Norðmenn eigi ekki eitt lið í umspili Meistaradeildarinnar eða Evrópudeildarinnar. Í fyrra lauk Evrópukeppninni að hálfu Norðmanna 12. desember þegar Tromsö komst ekki áfram úr riðlakeppni Evrópudeildarinnar, en nú urðu Evrópudraumar Norðmanna að engu sjöunda ágúst.

„Ég sé ekki jafnmarga leiki og áður, en það tala allir um að norska deildin sé alltaf að verða óáhugaverðari. Ég veit ekki hvað er að gerast,“ segir Veigar Páll við VG, en hann er talinn einn besti erlendi leikmaðurinn sem spilað hefur í norsku úrvalsdeildinni.

Íslendingar eru fyrirferðarmiklir í Noregi í ár, en fimm íslenskir leikmenn byrja flesta leiki Viking og þá er langmarkahæsti leikmaður deildarinnar Selfyssingurinn ViðarÖrnKjartansson.

„Noregur getur lært mikið af Íslendingum hvað varðar þróun leikmanna. Hér vilja ungir leikmenn æfa eins mikið og hægt er og gera það undir stjórn góðra þjálfara,“ segir Rúnar Páll Sigmundsson, þjálfari Stjörnunnar, við VG.

„Noregur hefur skilað góðum leikmönnum áður, en nú er íslenskur fótbolti á toppnum,“ segir Rúnar Páll.