Bryggjan í Eyjum þakin rusli

Mikið rusl var við afgreiðslu Herjólfs á Básaskersbryggju á Heimaey í Vestmannaeyjum í morgun. Um er að ræða varning sem þjóðhátíðargestir skildu eftir sig er þeir héldu til síns heima með ferjunni að loknum hátíðarhöldum.

„Þetta er eðlilegt enda verið ofboðslegur fjöldi fólks á bryggjunni,“ segir Gunnlaugur Grettisson, rekstrarstjóri Herjólfs. Erfitt hafi verið að nota tæki við hreinsunarstörf á bryggjunni vegna fjöldans sem þar hefur verið undanfarinn rúman sólarhring.

Fjölmennt hefur verið á bryggjunni síðan aðfaranótt mánudags þegar stór hluti fólks fór að huga að brottför. Myndaðist löng röð við afgreiðsluna strax upp úr klukkan fjögur um nóttina. Treystu margir á að geta komist með ferjunni þrátt fyrir að vera ýmist miðalausir eða eiga miða í seinni ferðir.

„Þetta er alltaf svona. Fólk sem á bókað heim frá Eyjum á þriðjudegi eða miðvikudegi kemur niður eftir með væntingar,“ segir Gunnlaugur. Það séu alltaf einhverjir sem mæti ekki í bókaða ferð á mánudagsmorgni. Þá myndist smá svigrúm og hægt að bæta fólki á biðlista í bátinn.

„Það var reyndar mjög vel mætt í gær þannig að þetta gekk rólega framan af,“ segir Gunnlaugur. Nokkrir hausar á biðlista hafi farið með í fyrstu ferðir en svo hafi röðin farið að ganga betur er líða tók á gærdaginn. Einhverjir hafi líka snúið frá bryggjunni aftur í gistinguna enda röðin verið sérstaklega löng.

Svo fór að röð hinna miðalausu tók ekki enda fyrr en upp úr miðnætti í nótt er Herjólfur fór sína síðustu ferð. Herjólfur siglir svo sjö sinnum í Landeyjahöfn í dag og ættu þá síðustu gestir Þjóðhátíðar að skila sér til síns heima.

Þrátt fyrir að margir gestir hafi verið svekktir með að komast ekki um borð í Herjólf segir Gunnlaugur framkomu gesta hafa verið til fyrirmyndar.

„Við erum að flytja gríðarlegan fjölda fólks. Það er ofboðslega gaman að taka á móti þessum börnum og gaman hve mikinn skilning það sýnir starfsfólki mínu.“