Íslenski boltinn

Umfjöllun, viðtöl og einkunnir: Breiðablik - Keflavík 4-4 | Átta mörk í Kópavoginum

Ingvi Þór Sæmundsson á Kópavogsvelli skrifar
Árni Vilhjálmsson, leikmaður Breiðabliks.
Árni Vilhjálmsson, leikmaður Breiðabliks. vísir/vilhelm

Breiðablik og Keflavík skildu jöfn með fjórum mörkum gegn fjórum í farsakenndum fótboltaleik á Kópavogsvelli í kvöld.

Leikurinn var allt í senn fjörugur, spennandi, dramatískur og sveiflukenndur, en ekkert sérstaklega vel spilaður.

Varnarleikur beggja liða var slakur, stundum óbærilega slakur, eins og lokatölurnar gefa til kynna.

Keflvíkingar byrjuðu leikinn mun betur, voru kraftmiklir og sóttu hratt á Blikavörnina.

Það var því í takt við gang leiksins þegar Aron Rúnarsson Heiðdal kom gestunum yfir á 5. mínútu með skalla eftir hornspyrnu Jóhanns B. Guðmundssonar og skalla Haraldar Freys Guðmundssonar fyrir markið.

Blikarnir vöknuðu lífsins eftir mark Arons. Þeir fóru að halda boltanum betur og náðu smám saman betri stjórn á leiknum.

Árni Vilhjálmsson, Guðjón Pétur Lýðsson og Höskuldur Gunnlaugsson voru allir mjög líflegir og hættulegir, en heimamönnum gekk samt illa að skapa sér opin færi. Þeir áttu nóg af skotum, en Jonas Sandqvist í marki Keflvíkinga átti í litlum vandræðum með flest þeirra.

Sænski markvörðurinn leit hins vegar ekkert sérstaklega út á 36. mínútu þegar Guðjón skoraði með skoti beint úr aukaspyrnu rétt fyrir utan vítateig. Skotið var gott en Sandqvist hefði líklega átt að gera betur í markinu.

Árni komst skömmu síðar í gott færi eftir laglega sókn, en Sandqvist varði skot hans.

Á lokamínútu fyrri hálfleiks tóku gestirnir svo forystuna á nýjan leik með furðulegu marki.

Þá kom fyrirgjöf frá vinstri inn á teiginn, Gunnleifur Gunnleifsson stökk upp í boltann með leikmanni gestanna og mistókst að handsama boltann.

Boltinn virtist á leið í netið, en Arnóri Sveini Aðalsteinssyni tókst á einhvern ótrúlegan hátt að bjarga með hjólhestaspyrnu. Boltinn fór hins vegar í slána og fyrir fætur Elíasar Más Ómarssonar sem skoraði í opið markið.

Blikar komu ákveðnir til leiks í seinni hálfleik og eftir rétt rúmlega mínútu leik var staðan orðin jöfn.

Árni átti þá frábæra sendingu inn fyrir Keflavíkurvörnina á Höskuld sem gerði allt rétt, kom sér inn fyrir varnarmann Keflvíkinga og skoraði af öryggi framhjá Sandqvist.

En aðeins þremur mínútum síðar náðu Keflvíkingar forystunni í þriðja sinn í leiknum.

Jóhann átti fyrirgjöf frá hægri, Elías framlengdi boltann á Hörð sem klippti hann í netið. Markið var fallegt en varnarleikur Blika var skelfilegur.

Hann var ekki mikið skárri á 69. mínútu þegar Frans Elvarsson slapp einn í gegn eftir þríhyrningsspil við Hörð. Frans var hinn rólegasti og kláraði færið vel framhjá Gunnleifi sem var óvenju óöruggur í marki Blika í kvöld.

Keflvíkingar virtust ætla að sigla sigrinum í höfn, en á 87. mínútu fengu Blikar líflínu þegar Stefán Gíslason skoraði með hælnum eftir hornspyrnu Guðjóns.

Við þetta greip um sig taugaveiklun í liði Keflvíkinga og heimamenn gengu á lagið.

Þeir sóttu stíft að marki Keflvíkinga og á 95. mínútu jafnaði varamaðurinn Baldvin Sturluson metin og tryggði Kópavogsliðinu stig. Niðurstaðan 4-4 jafntefli í ótrúlegum leik.

Eftir leiki kvöldsins munar aðeins tveimur stigum á Breiðabliki og Fram, en ljóst er að Blikar þurfa að bæta varnarleikinn hjá sér ef ekki á illa að fara.

Keflvíkingar sigla sem fyrr lygnan sjó í 6. sæti með 18 stig.

Guðmundur: Ég held að ég hafi gert risamistök
Guðmundur Benediktsson, þjálfari Breiðabliks, var ómyrkur í máli eftir 4-4 jafntefli gegn Keflavík á heimavelli.

„Mér þetta fyrst og fremst ofboðslega lélegur leikur af okkar hálfu og þetta var ekki eitthvað sem ég vil sjá.

„Ég held að ég hafi gert risamistök með þessari uppstillingu því það voru alltof margir sem áttu, eftir á að hyggja, ekkert skilið að spila þennan leik.

„Ég var frekar fúll að eiga bara þrjár skiptingar í hálfleik, þannig að ég ákvað að gera ekki upp á milli þeirra,“ sagði Guðmundur sem sá fátt jákvætt við spilamennsku sinna manna í kvöld.

„Þú þarft að vera klár þegar þú ert að spila við Keflavík og við vorum alls ekki klárir í kvöld og það sýndi sig úti á vellinum,“ sagði Guðmundur ennfremur. Hann kvaðst þó ánægður að hafa náð að bjarga stigi undir lokin.

„Mér líður ekki eins og við höfum unnið þennan leik, en vonandi mun þetta stig nýtast okkur í framhaldinu.

„Við getum kannski verið sáttir með að hafa lagt allt í sóknina undir lok leiksins og hafa náð að jafna leikinn. En að fá á sig fjögur mörk á heimavelli er hreinlega til skammar,“ sagði þjálfarinn og bætti við.

„Það ætti öllum að vera ljóst í hvaða stöðu við erum. Og þótt við höfum fengið eitthvað hrós fyrir ágætar frammistöður upp á síðkastið, þá getum við ekki farið að dansa einhvern sigurdans út af því.

„Við erum í bullandi fallbaráttu og þurfum á stigum að halda,“ sagði Guðmundur að lokum.

Kristján: Duttum í og úr takti
Kristján Guðmundsson, þjálfari Keflavíkur, var óánægður með að hafa tapað niður tveggja marka forystu gegn Breiðabliki í kvöld.

„Mér líður svolítið eins og við höfum tapað leiknum. Það eru fyrstu viðbrögð eftir að hafa fengið á sig mark í uppbótartíma.

„Auðvitað er maður svekktur en þegar maður lítum á alla hluti, þá tókum við allavega stig og töpuðum ekki. En við hefðum verið gríðarlega ánægðir með sigur.

„Sigur hefði, miðað við allt sem er að gerast hjá okkur, verið stórkostlegur,“ sagði Kristján sem bætti við að honum hefði ekkið fundist leikur sinna manna vera nógu góður.

„Ég þarf að sjá þessi mörk aftur, en mér fannst þau léleg og Blikarnir eru örugglega sama sinnis. Við duttum í og úr takti í þessum leik.“

Kristján sagði að jafntefli væru líklega sanngjörnustu úrslitin.

„Ef maður skoðar leikinn eftir á verður maður líklega ekkert svo svekktur, en það hefði verið frábært að ná sigri,“ sagði Kristján að lokum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.